Twite: Simba mtanipenda tu

Asema maumivu ya Yondani yamemalizika Kalunde Jamal BEKI wa timu ya APR ya Rwanda aliyeingia mkataba wa miaka miwili na Simba, Mbuyu Twite amesema kuwa anakuja Simba kuleta raha na anaamini atakuwa kipenzi cha mashabiki kutokana na soka yake. Mbuyu aliyeng'ara na APR katika michuano ya Kombe la Kagame, kwa mara ya kwanza alihojiwa na Spoti Mikiki wakati wa michuano hiyo akielezea kumalizika kwa mkataba wake na nia yake ya kutaka kuichezea Simba. Akizungumza na Mwananchi Jumapili kwa njia ya mtandao wa facebook, Twite alisema: "Nimekubali kwa ridhaa yangu, nitakuja kuichezea Simba na kuonyesha kiwango...lakini zaidi kuleta ushindani kwenye Ligi Kuu ya Tanzania." Kauli hiyo ya Twite imekuja muda mfupi baada ya kusaini mkataba wa miaka miwili na timu hiyo ya Mtaa wa Msimbazi. Twite aliyedakwa na Ismail Aden Rage aliyempatia Dola30,000 kwa mujibu wa gazeti dada la Mwanaspoti toleo la jana, anatarajia kujiunga na Simba wakati wowote baada ya kutoka DR Congo alikokwenda kuaga familia yake. Akizungumza katika mtandao huo, Twite alisema alipokuwa kwenye michuano ya  Kagame iliyomalizika wiki mbili zilizopita alisikia sifa za timu mbili pinzani, Simba na Yanga ambazo zote zilikuwa zikimwania. Alisema kuwa aliziona timu zote kuwa zina wachezaji wazuri na wanaoleta upinzani na zaidi ni kutoka nje hivyo kulingana na uwezo alionao anaamini anakuja kuleta mabadiliko kwenye ligi hiyo. Mbuyu aliyewahi kuzichezea FC Lupopo ya DR Congo, alikiri kusema kuwa kabla ya kuingia mkataba na timu hiyo kuna kiongozi mmoja wa Yanga alikuwa amemwambia wataonana siku hiyo kwa ajili ya kumsajili lakini tayari alikuwa amemalizana na Simba. "Nilichagua Simba kwa mapenzi yangu...ni kweli kulikuwa na kiongozi wa Yanga alikuwa Kigali kwa ajili ya kunisajili lakini nikaamua nibaki na hii kwa kuwa tayari Simba iko na faranga (fedha) mingi," aliandika Twite kwa maneno ya Kikongo. Aliongeza kusema kuwa akiwa Tanzania aliiona Simba na anaifahamu vizuri soka yao hivyo ana uhakika wa kuja kuibadilisha na kuleta upinzani kwenye timu ambazo Simba itakuwa ikikutana nazo. "...nimekubali kuja Simba, lakini pia viongozi inabidi wafanye mabadiliko kwa baadhi ya sehemu ikiwemo safu ya ushambuliaji ili tuweze kwenda sawa na kutwaa kila kikombe kinachokuja," alisema Twite ambaye amemaliza mkataba na timu ya APR mwezi huu. Alifafanua kuwa kulingana na alivyoona uchezaji wa timu za Tanzania zilizoshiriki kwenye michuano ya Kagame na kwa mujibu wa michuano hiyo ndizo timu zilizofanya vizuri kwenye ligi  na bado ana nafasi ya kuonyesha uwezo kutokana na wachezaji wengi kuwa na uwezo wa kawaida na siyo wa kutisha. Mwenyekiti wa klabu ya Simba Aden Rage alikwenda Kigali, Rwanda kwa ajili ya kumsajili mchezaji huyo na alifanya zoezi hilo Juzi na kumsainisha mkataba wa miaka  miwili wenye thamani ya Dola 30,000 . Kwa mujibu wa Mwanaspoti, wakati Rage akiwa amemalizana na mchezaji huyo wakiwa wanakunywa chai, Binkleb alifanikiwa kumpata Mbuyu kwenye simu na alipomwambia anataka waonane kwa ajili ya kusaini Yanga, Mbuyu alijibu kwa Kiswahili cha lafudhi ya ki-Congo akisema: "Nipo na bamutu ba Simba, tumekwisha malizana." Kusajiliwa kwa Mbuyu, sasa kunaifanya Simba kuimarisha ngome yake baada ya kumtema Lino Masombo wa Jamhuri ya Kidemokrasia ya Congo aliyeshindwa kuwika katika Kombe la Kagame. Ilikuwa inaaminika kuwa Mbuyu na pacha wake, Kabange Twite, hawawezi kwenda popote bila kuachana na huko nyuma walikuwa pamoja katika timu ya Lupopo.(source mwananchi.com)