Hifadhi yaTabaka la Hewa ya Ozoni Mwanza!!

Evelyn Mkokoi

Afisa Habari, Ofisi ya Makamu wa Rais

Serikali inakabiliana na changamoto kubwa ya wananchi kutokuelewa suala zima la sayansi ya hifadhi ya tabaka la hewa ya Ozoni.

Hayo yameeelezwa leo na Mkurugenzi wa Idara ya Mazingira kutoka Ofisi ya Makamu wa Rais Dkt Julius Ningu, katika kilele cha maadhimisho ya Siku ya kimataifa ya hifadhi ya tabaka la Hewa ya Ozoni yanayofanyika kitaifa mjini Mwanza yanayoambatana na uzinduzi wa kituo na mafunzo ya kunasa na kusafisha gesi chakavu za majokovu na viyoyozi.

Dkt Ningu ameeleza kuwa changamoto hii ndo imepelekea serikali kusogeza huduma hii kwa karibu zaidi kwa jamii kwa kupitia mafunzo haya kwa walengwa ambao ni wanafunzi wa chuo cha veta, mafundi mchundo, mafundi mekanika na mafundi wa kawaida.

Akisoma hotuba ya ufunguzi, kaimu katibu tawala wa wilaya ya Njamagana Bw.Elias Makori ameeleza kuwa matumizi ya kemikali haribifu kwa tabaka la hewa ya Ozoni yanatumika zaidi katika nchi zinazoendelea kama vile Tanzania na yanaweza kuleta madhara makubwa sana kwa jamii ikiwa ni pamoja na magonjwa ya saratani ya ngozi, na ugonjwa wa mtoto wa jicho.

Bw. Makori ameeleza kuwa kituo cha veta mkoani Mwanza ni miongoni mwa vituo vitano vya kikanda nchini , vinavyolenga katika kutekeleza mpango wa serikali wa kuondosha matumizi kemikali haribifu kwa tabaka la hewa ya Ozoni.

Vituo vingine nchini vitakavyohusishwa na jukumu hili ni pamoja na VETA Dar, Mbeya, Kigoma na Zanzibar. Uhifadhi wa tabaka la hewa ya Ozoni ni utekelezaji wa mkataba wa Vienna na Montrial ambayo Tanzania ni nchi mwanachama.

Ujumbe wa mwaka huu unasema, ‘Hifadhi ya Tabaka la Hewa ya Ozoni “Tuzingatie Wajibu na Majukumu yetu.”