JAJI MKUU AWAPANDISHA VYEO MAHAKIMU SINGIDA,DODOMA..!!!

Jaji Ramadhan akimwapisha hakimu Aziza Mbadjo (aliyenyanyua Quruan) kuwa hakimu katika mahakama ya hakimu mkazi mjini hapa jana.

Jaji Ramadhan (wa pili kutoka kushoto) akiwa kwenye picha ya pamoja na mahakimu wa mahakama ya hakimu mkazi mjini hapa na viongozi waliofuatana na jaji huyo.Picha zote na Hillary Shoo,

Na Hillary Shoo,

Singida.

JAJI mkuu wa mahakama ya Tanzania,Augustino Ramadhan, amewaagiza wafanyakazi wa mahakama nchini,kuhakikisha wanajiendeleza kielimu ili kujijengea mazingira mazuri ya kuweza kumudu vema majukumu yao ya kila siku.

Jaji Ramadhan ametoa wito huo jana (9/8/2010) muda mfupi baada ya kuwaapisha mahakimu watatu kuwa mahakimu wa mahakama ya hakimu mkazi.Hafla hiyo ilifanyika kwenye ofisi ya hakimu wa mahakama ya hakimu mkazi mjini hapa.

Alisema katika dunia ya sasa mambo mengi yanabadilika kwa kasi yakiwemo ya kisheria,kanuni na taratibu na hivyo,ili hakimu au mfanyakazi wa mahakama aweze kumudu kutekeleza wajibu wake vizuri, hana budi kujiendeleza kielimu.

Aidha, aliwataka kujiwekea mikakati ya kujiendeleza wenyewe au kutafuta misaada mbalimbali kwa madai kwamba wakisubiri mafungu ya fedha za serikali,wanaweza kuchelewa kujiendeleza kielimu. ”Binafsi nawapongeza sana ninyi kwa juhudi zenu binafsi za kujiendeleza kielimu,ninyi ni mfano mzuri wa kuigwa na wafanyakazi wengine wa mahakama nchini na hata sekta zingine”alisema.

Katika hatua nyingine, Jaji Ramadhan aliwaagiza mahakimu hao kwenda kutekeleza wajibu wao kwa kuzingatia sheria,kanuni na taratibu zilizowekwa na si vinginevyo. ”Nendeni mkafanye kazi kwa uadilifu mkubwa,msiige mambo yasiyofaa.Sheria,kanuni na taratibu ndio ziwaongoze katika kutekeleza majukumu yenu.Serikali inawalipa mishahara mizuri kwa lengo la kuwaokoa msijiingize kwenye matatizo”alifafanua.

Mahakimu walioapishwa jana, ni Fedinard Vugingi ambaye alikuwa hakimu wa mahakama ya mwanzo Kondoa mkoani Dodoma na sasa anakuwa hakimu mfawidhi wa mahakama ya wilaya ya Kondoa. Aziza Hassan Mbadjo aliyekuwa karani katika mahakama kuu ya ardhi Dar-es-salaam,sasa amekuwa hakimu katika mahakama ya hakimu mkazi mjini hapa.

Naye Terrysophia Cornelio Tesha aliyekuwa hakimu wa mahakama ya mwanzo Ipembe,sasa anakuwa hakimu katika mahakama ya hakimu mkazi Singida mjini.

Mahakimu wote hao watatu, wamejiendeleza kwa nguvu zao wenyewe. Jaji Ramadhan na msafara wake wameondoka Singida mjini leo (jana) asubuhi kuelekea mkoani Shinyanga.