LIPUMBA AUNGURUMA

BARAZA Kuu la Uongozi la Taifa la Chama cha Wananchi (CUF), limetoa wito kwa Watanzania kuichukulia hali ya kupanda kwa gharama za maisha kama changamoto ya kufanya mabadiliko makubwa ya uongozi nchini kupitia uchaguzi mkuu wa mwaka huu vinginevyo maisha bora waliyoahidiwa yatakuwa ndoto za alinacha.

Mwenyekiti wa CUF, Profesa Ibrahim Lipumba alisema baraza hilo limesikitishwa na ukosefu wa vipaumbele wa Rais Jakaya Kikwete na Serikali yake katika kupanga mikakati na mbinu bora za kukabiliana na hali mbaya ya uchumi na umaskini wa Watanzania kwa kutumia fedha nyingi kuwa mwenyeji na kuendesha Mkutano wa Jukwaa la Uchumi Duniani (WEF) kwa Afrika badala ya kuandaa Mkutano wa Kujadili Namna ya Kuinua Uchumi wa Tanzania (Tanzania Economic Forum) kwanza.

Prof. Lipumba aliyasema hayo jana Dar es Salaam wakati akitoa maazimio ya kikao cha baraza hilo, akisema kuwa ikiwa wataamua kuendelea kutawaliwa na 'utawala wa kifisadi' wa Chama cha Mapinduzi (CCM), suala la maisha bora kwa kila Mtanzania litaendelea kuwa ndoto za alinacha.

Profesa Lipumba alisema kuwa kupanda kwa maisha kumesababishwa na kutowajibika kwa Serikali ya CCM na kuwepo kwa ombwe kubwa la uongozi lililopo nchini, hivyo kusababisha kupanda kwa bei za bidhaa na mahitaji ya lazima ya kila siku ya wananchi.

"Huu ni mfano halisi wa kupanda kwa bei tangu mwaka 2005 hadi mwaka huu, sembe imepanda kutoka sh. 250/= kwa kilo hadi kufikia kati ya sh 600/= na 1,000/= mwaka 2010, sukari 560/= hadi sh. 1,600/= na 2,000/= kwa kilo, mafuta ya kupikia kutoka sh. 750/= kwa lita mpaka sh. 2,000/= na 2,500/=, mbolea kutoka sh. 8,000/= kwa mfuko wa kilo 50 mpaka 30,000/= na 45,000/= kwa sasa na vivyo hivyo kwa bidhaa nyingi nyinginezo," alisema Profesa Lipumba

Aliitaka serikali kuacha kutoa ahadi hewa zisizotekelezeka mfano kuongeza ajira kwa wananchi, huku akitoa takwimu za Benki ya Dunia kuwa zinaonesha kuwa katika kila watu 100 wanaoajirika Tanzania, 89 wana ajira za mashaka na wasiwasi.

Alisema takwimu zinazotolewa na serikali ni za kupika, ambazo huonesha kuongezeka kwa ajira katika sekta zisizokuwa rasmi, ikiwa na maana ya ajira za kubahatisha na kukata tamaa, kama zile za kuokota chupa za maji za plastiki na uuzaji wa karanga barabarani, ambazo haziwezi kuwaondoa Watanzania katika lindi la umaskini.

"Kushindwa kwa serikali kuwa na mipango thabiti na madhubuti ya kiuchumi kumesababisha kuongezeka kwa hali ya umaskini wa wananchi kutoka watu milioni 11.4 mwaka 2001 hadi kufikia milioni 12.9 mwaka 2007 na kumevunja kabisa matumaini ya wananchi kujikomboa kiuchumi na kujiletea maendeleo chini ya utawala wa CCM," alisema Profesa Lipumba.

Alisema Watanzania wanatakiwa kutambua kuwa hatua za Rais Kikwete za kujishughulisha na masuala ya kimataifa na safari zake za nje za mara kwa mara hakuisaidii nchi na badala yake anazitumia kama njia ya kukwepa kushughulikia matatizo ya msingi ya ndani ya nchi.

Kwa upande wa mgogoro wa serikali na wafanyakazi Profesa Lipumba alisema, wanaunga mkono madai ya msingi yaliyotolewa na wafanyakazi kupitia Shirikisho la Vyama vya Wafanyakazi nchini (TUCTA), wanaotaka kuboreshewa mishahara yao pamoja na maslahi yao kwa ujumla.

Alisema wamesikitishwa na kauli za vitisho, aibu na kufitinisha wafanyakazi na wananchi kwa serikali kutoa habari na taarifa zisizo na ukweli kamili ili kuwapaka matope viongozi wa TUCTA.

"Mheshimiwa Rais amepewa dhamana kubwa na wananchi kuwaongoza na kuwatatulia matatizo yao pale yanapojitokeza. Kwa kitendo chake cha kukurupuka na kusikiliza upande mmoja tu wa watendaji wa serikali bila ya kuwasikiliza TUCTA na kisha kuwahukumu hadharani, Rais hakuwatendea haki Watanzania hasa ikizingatiwa dhamana kubwa waliyompa," alisema Profesa Lipumba na kuongeza kuwa

"Rais hakuwatendea haki Watanzania hasa ikizingatiwa dhamana kubwa waliyompa, Baraza Kuu linaamini ingekuwa ni vyema kama angeliwaita viongozi wa TUCTA kuwasikiliza na kushauriana nao hatua muafaka za kufuatwa katika kushughulikia suala hili kabla ya kuwahukumu hadharani."

Alisisitiza kuwa haikuwa busara kwa Rais Kikwete kutumia 'jukwaa la wazee wa CCM wa vijiweni,' ambao wengi wao si wafanyakazi, kuelezea matatizo ya wafanyakazi na kudai kuwa amejidhalilisha na kudhihirisha tena kuwepo kwa ombwe kubwa la uongozi katika serikali anayoiongoza.

Aidha, alisema baraza hilo limelaani vitisho alivyovitoa rais kwa wafanyakazi nchini na kudai kuwa vinatakiwa kulaaniwa na wapenda amani na haki ili kuinusuru nchi na machafuko.

liongeza kuwa vitisho na kashfa walizofanyiwa wafanyakazi zinatakiwa kuchukuliwa kama changamoto na wanancho wote kwa ujumla, ili kuweka nguvu zaidi za kudai haki zao, pia wasichoke, wasiogope na wasitishwe wala kurudi nyuma katika kutekeleza dhamira zao za kupigania haki nchini.